રોહિત શર્મા વન-ડે રેન્કિંગમાં બીજા સ્થાને પહોંચ્યો:ટૉપ-10માં ત્રણ ભારતીય; પાકિસ્તાનનો આ ખેલાડી ટોપ પર યથાવત

ભારતીય ક્રિકેટ ટીમના કેપ્ટન રોહિત શર્મા ઈન્ટરનેશનલ ક્રિકેટ કાઉન્સિલ (ICC)એ જાહેર કરેલી તાજેતરની ODI રેન્કિંગમાં બીજા સ્થાને પહોંચી ગયો છે. તેણે આ મહિનાની શરૂઆતમાં શ્રીલંકા સામેની વન-ડે શ્રેણીમાં સારું પ્રદર્શન કર્યું હતું, જેના કારણે તેને આ રેન્કિંગમાં ફાયદો થયો છે.

રોહિતે તેના ઓપનિંગ પાર્ટનર શુભમન ગિલને 765 રેટિંગ પોઈન્ટ સાથે પાછળ છોડી દીધો. ગિલ હવે ત્રીજા નંબરે પહોંચી ગયો છે. ટૉપ-10માં ત્રણ ભારતીય સામેલ છે. જ્યારે પાકિસ્તાનનો બાબર આઝમ ટોપ પર યથાવત છે.

રોહિતે શ્રીલંકા સામે બે અડધી સદી ફટકારી હતી

રોહિત શ્રીલંકા સામેની વનડે શ્રેણીમાં સૌથી વધુ રન બનાવનાર ખેલાડી હતો. તેણે 3 મેચમાં 52.33ની એવરેજ અને 141.44ની સ્ટ્રાઈક રેટથી 157 રન બનાવ્યા. જેમાં તેની 2 અડધી સદીનો પણ સમાવેશ થાય છે. શ્રેણીની ત્રણ મેચમાં તેનો સ્કોર 58, 64 અને 35 રન હતો. તેના સિવાય મોટાભાગના ભારતીય બેટર્સે નિરાશ થયા અને ભારત શ્રેણીમાં 0-2થી હારી ગયું. શ્રેણીની પ્રથમ મેચ ટાઈ રહી હતી.

ODI બોલિંગમાં મહારાજ ટોચ પર

ODI ક્રિકેટમાં દક્ષિણ આફ્રિકાના બોલર કેશવ મહારાજ 716 રેટિંગ પોઈન્ટ સાથે પ્રથમ સ્થાને છે. ઓસ્ટ્રેલિયાના જોશ હેઝલવુડ (688) બીજા સ્થાને, ઓસ્ટ્રેલિયાના એડમ ઝામ્પા (686) ત્રીજા સ્થાને, ભારતના કુલદીપ યાદવ (665) ચોથા સ્થાને અને નામીબિયાના બર્નાર્ડ શોલ્ટ્ઝ (657) પાંચમા સ્થાને છે.

ટૉપ-10 ઓલરાઉન્ડરોમાં એક પણ ભારતીય નથી
અફઘાનિસ્તાનનો મોહમ્મદ નબી ICCની ODI રેન્કિંગમાં વિશ્વનો નંબર-1 ઓલરાઉન્ડર ખેલાડી છે. તેના રેટિંગ પોઈન્ટ 320 છે. ટૉપ-10માં એક પણ ભારતીય ખેલાડી સામેલ નથી. આ યાદીમાં બાંગ્લાદેશના શાકિબ અલ હસન (292) બીજા સ્થાને, ઝિમ્બાબ્વેના સિકંદર રઝા (288) ત્રીજા સ્થાને, પાપુઆ ન્યૂ ગિનીના અસદ વાલા (248) ચોથા સ્થાને અને અફઘાનિસ્તાનનો રાશિદ ખાન પાંચમા સ્થાને છે. સ્થળ (239) છે.